Čõhččpeiʹvv Äʹrbbvuõttpõõrtâst alttad Sääʹmkulttuurneäʹttel

Nuõrttsääʹmkultturfondd reäšš eeʹjj 2015 Sääʹmkulttuurneäʹttel šõddmõõžžid ǩeeʹjjmieʹldd čõõuč õõutsââʹjest jeeʹres tuåimmjeejaivuiʹm. Sääʹmkulttuurneäʹttel šõddmõõžž altteet piâtnâc 11.2.2015 Čeʹvetjääuʹrest Saaʹmi Äʹrbbvuõttpõõrtâst čõhččpeeiʹvin, koid reäʹšše Sääʹm-muʹzei Siida da Čeʹvetjääuʹr škooul õõutsââʹjest.

Čõhččpeeiʹv päʹšttep leeiʹb ǩiuggnest, kååʹtt lij šeelljast, tuejjeep vuõddjid da sorstõõǥǥid suõrmivuiʹm de škooulneeʹǩǩin lie vuäʹmm täʹvvri kaaupšummuš da kaaʹffpõrtt. Čõhččpeeiʹv ääiʹj Äʹrbbvuõttpõõrt kueʹllpooʹǥrev vääras raajât saaʹminallšem laaǥǥ lââuʹŋest. Tän lââʹssen vuäitak suukkâd ođđ vueʹddvõnnsin, koon raʹjješ ǩeässa.

Sääʹmkulttuurneäʹttel juätkai sueʹvet 12.9.2015 čiâss 10 ääiʹj maaccǩid kuäreeʹl Čeʹvetjääuʹr Siid Tuâjjpõõrtâst. Čeʹvetjääuʹr škooulneeʹǩǩ vueʹlǧǧe Turku meeraikõskksaž Ǩeʹrjjpeeiʹvid sääʹmkulttuur čuäʹjtem diõtt. Škooul sääʹmmpihttâz lie puäʹres da leezztam, nuʹtt što mij tuʹmmjim, što kuärrap ärttlin ođđ maaccǩid. Maaccǩi lââʹssen taarbšep veâl veâuldõõzzid maaccǩi vääras. Puäʹđ mieʹldd, što kuärrap da mättjep õõutsââʹjest! Kuärram-mašinaid da aunnsid kaaunak mij åʹrnn. Taʹrjjeep kaaʹff še.

Mâʹŋŋlest čâhčča riâššât lââʹss Sääʹmkulttuurneäʹttel prograammid: mättʼtõõttâp raajjâd määʹrfaid võõrâst, raajjâp täʹhtt-tuâjaid da ǩiicceep Sääʹmfiiʹlmid. Darja põõrtâst Njeäʹllmest poorrâp saaʹmi veäraid da rõsseep mâiʹd-ne ǩueʹttmääʹrǩest. Täin teâđtep jeeʹrab.