Nuõrttsaaʹmi aazztem 70-eeʹjjprääʹzneǩ påʹrǧǧmannust Čeʹvetjääuʹrest

Nuõrttsaaʹmi aazztem 70-eeʹjjprääʹzneǩ prääʹzkjet sueʹvet 24.8.2019 Čeʹvetjääuʹr škooul vuuʹdest. Aazztemprääʹzneǩ jäʹrjste vuõssmõs vuâra eeʹjj 1979. Juõʹǩǩ lååǥǥad eeʹjj jäʹrjstum aazztemprääʹzneǩ lij ååʹn viiđâd. Prääʹzneǩ cisttkueʹssen lie pâʹjjel 70-âkksa nuõrttsäʹmmla.

Peiʹvv älgg ortodookslaž liturgiain čiâss 10.00. Jiõčč prääʹzneǩ lij veär mâŋŋa čiâss 14.00 ääʹljeeʹl, prograammâst lie jm. leuʹdd- da laullčuäʹjtõõzz, saakkvuâr da kaʹdreʹl. Peiʹvv poott jeäʹǩǩeskonsertta, kååʹtt älgg čiâss 19.00.

Nuõrttsaaʹmi aazztummuž prääʹzkjet äʹrbbvuõttlânji pââʹzzteei Treeffan Peäccamneeʹǩǩ pââʹzztem-määʹtǩ õhttvuõđâst da seämma poodd ââʹnet Čeʹvetjääuʹr škooul 70-eeʹjjprääʹzneǩ še. Prääʹzneǩ jäʹrjste Saaʹmi siidsååbbar da Lappi ortodookslaž sieʹbrrkåʹdd õhttsažtuâjast Nuõrttsääʹmkulttuurfoondin da pääikla tuåimmjeeʹjivuiʹm.

Markkânkaaupšeejid da jiõččtäättlaž tuâjjlaid ooʒʒât

Prääʹzneǩpääiʹǩest lie še markkân, koozz jeeʹres tuåimmjeei vuäiʹtte pueʹtted kaaupšed ouddmiârkkân ǩiõtt-tuâjaid da jeeʹres ouddsid. Tän diõtt ååʹn ooʒʒât tuåimmjeeʹjid, kook haaʹlee pueʹtted markknid kaaupšed ouddsees. Tõn lââʹssen prääʹzneǩ riâššmõõžži diõtt ooʒʒât jiõččtäättlaž tuâjjlaid, kook vuäitče veäʹǩǩted prääʹzneǩpääiʹǩ raajjmest da čiistmest di tuåimmjed jeeʹresnallšem tuâjain prääʹzneǩ pooddâst.

Saaʹmi siidsåbbar koontâr väldd vuâstta iʹlmmtõõttmõõžžid nuʹtt markknid ko jiõččtäättlaž tuõjju.

Lââʹssteâđ:

Saaʹmi siidsååbbar

kolttien.kylakokous@co.inet.fi

050 396 1297 / saaʹmi ouddooumaž Veikko Feodoroff

040 715 3680 / koontâr