Siidsåbbar

Siidsåbbar lie vaaldšemriâšldõõǥǥ ââʹmõs tuʹmmjeei orgaan. Siidsåbbrin tueʹjjeet vääžnmõs linnjummšid saaʹmid kuõskki veiddsõs da vuâđđjuurdlaž aaʹššin di ouddmiârkkân vaʹlljeet sääʹmsuåvtõõzzid da vaal-luʹvddkååʹdd.

Sääʹmlääʹjj mieʹldd Njeäʹllem-Keväjääuʹr da Njauddâm sääʹmvuuʹdin ââʹnet vuuʹdest jälsteei saaʹmi õhttsaž siidsåbbar uuʹccmõsân õõut vuâra eeʹjjest. Tän lââʹssen taarb mieʹldd vueiʹtet jäʹrjsted jeeʹres såbbrid še. Taarb mieʹldd vueiʹtet jäʹrjsted vuuʹdi õhttsaž siidsåbbar, jõs ǩiõttʼtõõllâmnalla lij obb vuuʹd kuõskki veiddsõs leʹbe vuâđđjuurdlaž äʹšš.

Siidsåbbrin ǩiõttʼtõõlât čuäjtõõzzid da ceâlklmid saaʹmi jieʹllemvueʹjjid da jieʹllemåårrmõõžžid kuõskki veiddsõs da vuâđđjuurdlaž aaʹššin di vaʹlljeet sääʹmsuåvtõõzzid da saaʹmi ouddoummuvaal tååimtummšest vaʹstteei vaal-luʹvddkååʹdd. Siidsåbbrin ǩiõttʼtõõlât še jeeʹres saaʹmi äʹrbbvuõđlaž jieʹllemvueʹjjid da jieʹllemåårrmõõžžid di sääʹmǩiõʹlle da -kulttuuʹre vaikkteei aaʹššid.

Siidsåbbrin tueʹjjeet vaaldšemriâšldõõǥǥ tåimmʼmõõžž määiʹnest vääžnmõs linnjummšid. Vaaldšemriâšldõõǥǥ toiʹmmjummuž da juätkkjummuž diõtt lij vääžnai, što sääʹm aktiivlânji vuässâʹtte såbbrid.

Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzzid leʹbe vuõiggâdvuõđid, lij suʹst peäggtum vueʹzzin vuäittmõš vuässõõttâd såbbra da ââʹnned särnnamvääʹld toʹben. Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.