Saaʹmi ouddooumaž
Saaʹmi ouddoummu vaʹlljeet koumm eeʹjj kõõskin vaalin. Sääʹmsuåvtõõzz vaʹlljee tåimmpââʹj aalǥâst vuõssmõs såbbreʹstes väärrouddoummu. Saaʹmi ouddooumaž jååʹđat siidsååbbar-riâšldõõǥǥ toiʹmmjummuž da tåimm sääʹmsuåvtõõzi saaǥǥjååʹđteeʹjen.
Sääʹmlääʹjj 46 § mieʹldd saaʹmi õhttsaž aaʹšši hoiʹddjed da saaʹmi ouddõõzzid vuåppâd vueiʹtet vaalin vaʹlljeet saaʹmi ouddooumaž, koon tåimmpââʹjj lij seämma ǥu sääʹmsuåvtõõzzi vuäzzlain, koumm eeʹjj.
Saaʹmi ouddoummu tuâjjan lij eeʹttkâʹstted saaʹmid. Ouddooumaž tåimm saaʹmi õutstõõzzâst õhttvuõttoummžen veʹrǧǧniiʹǩǩid da jeeʹres toiʹmmjeeʹjid. Saaʹmi ouddooumaž seuʹrrai veiddsânji saaʹmi äʹrbbvuõđlaž jieʹllemvueʹjji da jieʹllemåårrmõõžži di sääʹmǩiõl da -kulttuur vueʹjj da taarb mieʹldd tuejjad aalǥtõõzzid tõi tuõʹllʼjummšest da ooudâs viikkmõõžžâst.
Ouddoummu tuâjjan lie sääʹmasetõõzz (133/1997) 41 § mieʹldd jm. ââʹnned huõl saaʹmi siidsåbbri da sääʹmsuåvtõõzzi õʹhtte kåččmõõžžâst di tõi tuejjeem tuʹmmstõõǥǥi tiuʹddepiijjmõõžžâst, uʹvdded teâđaid da vuäʹpsted ooccâd da ââʹnned ouddõõzzid, koid saaʹmid miõttât di seuʹrrjed lääʹjjšiõttummuž, veʹrǧǧniiʹǩǩi tuʹmmstõõǥǥid da jeeʹres tååimid, koin vuäiʹtte leeʹd vaikktõõzz saaʹmi piʹrǧǧummša da jeeʹres jieʹllemåårrmõõžžid.
Sääʹmsuåvtõõzzi õhttsaž sååbbar vaʹlljad ouddooumže vääʹrroummu, kååʹtt hoiʹddai ouddoummu tuâjaid, jõs ouddoummu lij cõggnam leʹbe cõgldem vuâllsaž. Ouddooumaž da suu vääʹrrooumaž âʹlǧǧe leeʹd sääʹmvuuʹdest jälsteei sääʹmǩiõll siltteei sääʹm, kook lie tuõjju põʹstti.
Saaʹmi ouddooumaž pââʹjest 2024-2026: Veikko Feodoroff
Väärrouddooumâž pââʹjest 2024-2026: Terhi Harju