Puõʹtti siidsåbbrin valmštõõđat ouddoummuvaali jäʹrjstummša di saǥstõõllâd sääʹmvuuʹd aaʹššin

Saaʹmi äʹrbbvuõđlaž siidsåbbrid jäʹrjstet pâʹsslašttâm-mannust, Čeʹvetjääuʹrest pâʹsspeeiʹv 5.3. di Njeäʹllmest pâʹsspeeiʹv 12.3.

Eeʹjj 2023 jäʹrjstet saaʹmi ouddoummuvaal, koin vaʹlljeet ouddoummu puõʹtti tåimmpâjja eeʹjjid 2024-2026. Puõʹtti siidsåbbrin vaʹlljeet vaal-luʹvddkååʹdd, kååʹtt tååimat ouddoummuvaalid.

Njauddâm da Njeäʹllem-Keväjääuʹr vuuʹdin kuhttuin vaʹlljeet vaal-luʹvddkådda koumm vuäzzla di siʹjjid jiiʹjjez-i väärrniiʹǩǩid. Vaal-luʹvddkåʹdd ouddmiârkkan mieʹrrad vaali ääiʹj da valmštââll di tååimat vaalid.

“Leäp põrggâm vuäǯǯad mädd- da meäʹcctäällministeriast tän eeǥǥas lââʹzz resuuʹrsid vaali jäʹrjstem vääras, jurddjen lij vuäǯǯad vaal-luʹvddkådda vueʹssäiggsaž piisar di jeeʹres peäʹlin se pueʹreed vaalvueʹjj.” mušttal saaʹmi ouddooumaž Veikko Feodoroff.

Siidsåbbrin saǥstõõlât Säʹmmlai tuõttvuõtt- da suåvâdvuõttkomissio tuâjast di plaanuum säʹmmlai kuullmõõžžin di Sääʹm psykososiaalʼlaž tuärj juâkkaz Uuvj kääzzkõõzzin. Såbbrin lie pääiʹǩ âʹlnn komissaar Irja Jefremoff da Uuvj tuâjjlaž Leena Fofonoff.

Såbbrest saǥstõõlât sääʹmvuuʹd kueʹllšeeʹllemaaʹššin še. Jurddjen lij smiõttâd ouddmiârkkan, måkam aaʹššid âlgg väʹldded lokku puõʹttivuõđ plaanummšest da muʹvddem sääʹmvuuʹd oummi miõlâst lij kueʹllčaaʹcci nääll ânnʼjõžääiʹj.

Saaʹmi ouddooumaž Veikko Feodoroff ääʹvad sååbbaraaʹššid puõʹttinalla:

”Ååʹn lij älggam tän vaalpââʹj mââimõs tåimmeeʹǩǩ da såbbrin puuʹtet tiõttu Saaʹmi siidsåbbar mõõʹnni eeʹjj tååimid da mušttlet tõin aaʹššin, koivuiʹm ååʹn reâuggap. Kuulât ouddmiârkkân Taarr Sääʹmteeʹǧǧ alttääm tuâjast Paččjooǥǥ sääʹmpokoiniiʹǩǩi oʹđđestruõkkmõõžž plaanummšest di sääʹmvuuʹd määddââʹnnemaaʹššin. Såbbrin čuäjtõõlât še Saaʹmi siidsåbbra plaanuum logo. Takai sååbbarääʹšš jie kuuitâǥ leäkku čuuʹt jiânnai de ååskam, što jäänmõsân såbbrin saǥstõõlât. Ouddoummu tuâjast lij muu miõlâst vääžnai mušttled ääiʹjpoddsaž aaʹššid, kuullâd maacctõõzz oummin di saǥstõõllâd õõutsââʹjest miʹjjid tääʹrǩes aaʹššid. Täi vääras siidsåbbar lie samai šiõǥǥ pääiʹǩ. Pueʹtted mieʹldd kuvddled da mainsted!”

Njauddâm vuuʹd saaʹmi siidsååbbar ââʹnet pâʹsspeeiʹv 5.3.2023 ääʹljeeʹl čiâss 14.00 Čeʹvetjääuʹr škooulâst (Sevettijärventie 9076).

Njeäʹllem-Keväjääuʹr vuuʹd saaʹmi siidsååbbar ââʹnet pâʹsspeeiʹv 12.3.2023 ääʹljeeʹl čiâss 12.00 Njeäʹllem sieʹbrpõõrtâst (Siikajärventie 40).

Saaʹmi siidsååbbar

Saaʹmi siidsååbbar lij saaʹmi äʹrbbvuõđlaž vaaldšemriâšldõk. Saaʹmi siidsåbbar toiʹmmjummšest šiõtteet sääʹmlääʹjest (253/1995), koon täävtõssân lij viikkâd ooudâs sääʹmnarood da -vuuʹd jieʹlleemåårrmõõžžid da piʹrǧǧeemvuäittmõõžžid di juäʹtǩǩed da viikkâd ooudâs sääʹmkulttuur.

Siidsåbbar lie vaaldšemriâšldõõǥǥ ââʹlmõs tuʹmmstõktueʹjjeemorgaan da siidâst jälsteei saaʹmi aktiivlaž vuässõõttmõš såbbrid juätkk sijddsååbbar-riâšldõõǥǥ ooudâs.

Siidsåbbar

Njauddâm da Njeäʹllem-Keväjääuʹr vuuʹdin jäʹrjstet siidsåbbar kuhttu vuuʹdin uuʹccmõsân õõut vuâra eeʹjjest. Siidsåbbrin ǩiõttʼtâʹlle eʹtǩǩõõzzid da ciâlklmid saaʹmi jieʹllemvueʹjjid da -åårrmõõžžid kuõskki veiddsõs da vuâđđjuurdlaž aaʹššin.

Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzz leʹbe vuõiggâdvuõđid, lij suʹst peäggtum vueʹzzin vuäittmõš vuäʹssõõttâd såbbra da ââʹnned särnnamvääʹld toʹben.

Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.

teʹkstt: Saaʹmi siidsååbbar

Lââʹssteâđ: Saaʹmi ouddooumaž Veikko Feodoroff, teʹl. 050 396 1297