Saaʹmi ouddoummuvaal ââʹnet kålggmannust – vaal-luʹvddkåʹdd piisar tuâj ooccâmnalla
Saami ouddoummuvaal ââʹnet pâʹsspeeiʹv 8.10.2023. Vaalin vaʹlljeet saaʹmi ouddoummu poʹdde 1.1.2024 – 31.12.2026. Võboršiiʹǩǩi piijjmõš älgg påʹrǧǧmannu 1. peiʹvv da da poott 31.8.2023 čiâss 16.00.
Võboršeǩ âlgg leeʹd sääʹmvuuʹdest põõššinalla jälsteei sääʹmǩiõl siltteei säʹmmlaž, kååʹtt lij tuõjju põʹstti. Ääiʹjab iiʹjji nalla pukin võboršeʹǩǩen pijjum oummid täʹrǩstet vaalââʹnteivuõđ sääʹmǩiõl silttummuž peäʹlest.
Piisar tuâj ooccâmnalla
Vaal-luʹvddkådda ooccat piisar vueʹssäiggsaž tuõjju äiʹǧǧkõõskâst 15.8.-31.10.2023. Tuâjjäiʹǧǧ lij kõskkmieʹrin 29 čiâssâd neäʹttlest. Ooccâmäiʹǧǧ poott sueiʹnnmannu looppâst.
“Lij samai šiõǥǥ, što Mädd- da meäʹcctäällministeria miõttâm teäggtõõzz, kååʹtt tuejjat vuäittmõõžž vueʹssäiggsaž piisar paʹlǩǩummuž saaʹmi ouddoummuvaal jäʹrjstummuž vääras. Ääiʹjben tuâj lij håiddam siidsåbbar piisar jeeʹres tuâjai lââʹssen di mõõnni eeʹjjin šõddâm tuâjjmeäʹr diõtt vaal-luʹvddkååʹdd jiiʹjjes piisar lij taarblaž. Puõʹtti vaalin põrggâp viikkâd ooudâs vaaljäʹrjstõõllmõõžžid, jeäʹrbi mieʹldd strooiʹteljiõnstummuž peäʹlest da vuõltteeʹl teâđ jiõnstemvuõiggâdvuõđâst ouddoummuvaalin juõʹǩǩ jiõnstemvuõiggâdvuõttnekka. Piisar tuâj lij tän määiʹnest tääʹrǩes sââʹjest še. Tuäivvap, što vuäǯǯap jiânnai ooccmõõžžid piisar tuõjju”, ceälkk vaal-luʹvddkååʹdd saaǥǥjååʹđteei Joni Gauriloff.
Vaal-luʹvddkååʹdd piisar tuâjjan lie jm. vaal jäʹrjstõõllmõõžž, iʹlmmtõõzzi raajjmõš da teâđtummuš, võboršiiʹǩǩi piijjmõʹšše da vaal-loǥstõõǥǥ raajjummša di taʹrǩǩummša õhttneei tuâj di jeeʹres vaal-luʹvddkååʹdd vieʹǩǩteei tuâj. Sääʹmǩiõl tääid ǩiõččât tuâjast pueʹrrvuõttân.
Jiõnstemvuõiggâdvuõttniiʹǩǩid vuõltteet teâđ jiõnstemvuõiggâdvuõđâst pååʹšt mieʹldd čõhččmannust
Saaʹmi ouddoummuvaalin jiõnstemvuõiggâdvuõttneeʹǩǩ lie Aanar kååʹddest 51 peiʹvved ouddâl vaalpeeiʹv jälsteei tiuʹddvälddsaž säʹmmla da sij pieʹllkueiʹm. Vaal-luʹvddkåʹdd vuõlttad vaal-loǥstõõǥǥ raajjmõõžž mâŋŋa čõhččmannu ääiʹj teâđ jiõnstemvuõiggâdvuõđâst pukid jiõnstemvuõiggâdvuõttniiʹǩǩid pååʹšt mieʹldd. Vaalin jiõnstemvuõiggâdvuõttniiʹǩǩi loǥstõõǥǥ lie täʹrǩstemnalla čõhččmannust.
Ooccmõõžžid piisar tuõjju raaukât tååimted mââimõõzzâst vuõssaarǥ 31.7.2023 čiâss 16.00 addrõʹsse vaal(at)saamisiidsaabbar.fi.
Teʹkstt: Saaʹmi ouddoummuvaal vaal-luʹvddkåʹdd
Lââʹssteâđ: vaal(at)saamisiidsaabbar.fi, teʹl. 040 4479 259