Taar beäʹl Sääʹmteʹǧǧ jääʹrjast ǩieʹssmannust såbbrid säʹmmlai paacctõõzzi maacctummšest

Taar beäʹl Sääʹmteʹǧǧ kåčč säʹmmlaid ǩieʹssmannust Njauddmest da Njeäʹllmest järjstum såbbrid saǥstõõllâd säʹmmlai paacctõõzzi maacctummšest:

“Sääʹmteʹǧǧ lij vuäǯǯam maacctemraukkmõõžž 21 nuõrttsäʹmmla paacctõõzzin Paččjooǥǥâst, Saujj-Vaʹrjjlest. Paacctõõzz lie Paččjooǥǥ siid oummuin, da tõk lie määŋg čueʹđ eeʹjj ääiʹjkõõskâst. Paččjooǥǥ sijdd juâkkjõõvvi riikki raaʹji ǩeässmõõžži diõtt da mââibeäʹlnn jälste ååʹn Taarâst, Lääʹddjânnmest da Ruõššjânnmest.

Paacctõõzz lie ååʹn Oslo universiteeʹtt bioantropolooglaž norldõõǥǥin. Sääʹmteeʹǧǧest lij, suåppmõõžž pääiʹǩ Oslo universiteeʹttin, väldd mieʹrreed âlgg-a paacctõõzzid maaccted nuʹtt što tõid vuäitt oʹđđest ruõkkâd. Tän vääras lij aalǥtum tuâjj-joouk, koʹst liâ mieʹldd Oslo universiteʹtt, Äʹvv Saaʹmi Muʹzei, Saaʹmi siidsååbbar da Taar beäʹl Sääʹmteʹǧǧ.

Sääʹmtegga lij tääʹrǩes kulstõõllâd sääʹmõutstõõzzin tõn vueiʹnlmin ääʹššest.
Tõn diõtt mij haaʹleep ââʹnned såbbrid, što kuullâp mâiʹd mââibeäʹlnn puõʹtti joʹrdde oʹđđest ruõkkmõõžžâst, da što vueiʹttep jueʹǩǩed teâđaid paacctõõzzin. Mij taʹrjjeep äävai sââʹj kulstõõllmõʹšše nuõrttsäʹmmlai kõõskâst. Tõn diõtt såbbar jie leäkku äävai mediaaʹje.

Mij taʹrjjeep porrmõõžž da jååʹđtummuž såbbrid Lääʹddjânnam beäʹlnn. Jõs taarbšak
jååʹđtummuž, iʹlmmet tõʹst Saaʹmi siidsåbbra (piisar Terhi Harju, teʹl. + 358 40 715 3680, terhi.harju(at)saamisiidsaabbar.fi). Såbbrest lij tuʹlǩǩummuž nuʹtt, što toʹben vuäitt mainsted nuõrttsääʹmǩiõl leʹbe lääʹddǩiõl.”

Kuäʹss da koʹst:

• Äʹvv Saaʹmi Muʹzei, Njauddâm, vuõssargg 10.06.24 čiâss 17.00 (Taar ääiʹj)
• Njeäʹllem sieʹbrpõrtt, Njeä’llem, mââibargg 11.06.24 čiâss 16.00 (Lääʹddjânnam ääiʹj)

Jõs taarbšak jååʹđtummuž såbbrid Čeʹvetjääuʹr vuuʹdest Njauddma leʹbe Aanar da Âʹvvel vuuʹdest Njeällma, iʹlmmtõõđ piâtnâc 31.5.2024 mõõʹneest Saaʹmi siidsåbbar piisar Terhi Harju addrõʹsse terhi.harju(at)saamisiidsaabbar.fi leʹbe teʹlfoonin 040 715 3680.

Teʹkstt: Sámediggi | Sääʹmteʹǧǧ (Taarr)