Njeäʹllmest pâʹsspeeiʹv 25.8. jäʹrjstum aazztemprääʹzneǩ tääʹrǩab programm lij õlmstõttum – prääʹznka jäʹrjstet jååʹđtummuž Njauddmest

Saaʹmi aazztummuž 75-eeʹjjprääʹzneǩpeiʹvv lij Njeäʹllmest pâʹsspeeiʹv 25.8. Prääʹzneǩ lij pukid äävai da tõn prääʹzkjet Wilderness Hotel Nellim ǩeʹddmääʹrǩest prääʹzneǩ-kääʹđsest. Prääʹzneǩ älgg tueʹlää prääʹzneǩ-kääđsest tååimtum liturgiain, koon mâŋŋa hoteeʹll restraantâst lij peiʹvvporrmõš (pääkkteʹmes mähss). Prääʹzneǩprograammâst lie saakkvuâr, musikkčuäʹjtõõzz di kaʹdreeʹl.

Prääʹzneǩprograammâst määŋgpeällsâž musikkčuäjtõõzz

Prääʹzneǩprogramm lij rajjum määŋgpeällsaž musikkčuäjtõõzzi pirr. Čeʹvetjääuʹr škooulneǩ Samuel Porsanger čuäjat prääʹznǩest saaʹmi äʹrbbvuõđlaž leeuʹd. Âʹvvel škooul musikkjoouk čuäjtõõzzâst kuulât sääʹmǩiõllsaž musiikk, joouk jååʹđat Katri Kittilä. Prääʹznǩest čuäjteei Kootkmiõhtt lij kooum nuõr räʹppjeei joukk, koon vuäzzla Ilmari Leivo, Aarni Seri ja Pieti Niemenmaa lie Čeʹvetjääuʹr škooulneeʹǩǩ, lââʹssen čuäjtõõzzâst lij mieʹldd Tero Harju. Prääʹznǩest kuulât še äʹrbbvuõđlaž ǩiʹlddsääʹmǩiõllsaž musiikk, koon čuäjat Semmen Bolshunov. Lââʹssen vueiʹnet äʹrbbvuõđlâž kaʹdreeʹlčuäʹjtõõzz.

Prääʹzneǩ poott Suõmmkar-musikkjoouk čuäjtõʹsse. Musikkjoukk õhttââll äʹrbbvuõđlaž sääʹm-musiikk modeeʹrn maaiʹlm-musiʹǩǩe pop- da rock-musiikk vaaiktõõzzivuiʹm. Suõmmkar vuõssmõs album iʹlmstõõvi eeʹjj 2018 da nuʹbb lij iʹlmmstõõvvmen âʹlddpuõʹttivuõđâst. Suõmmkar-musikkjooukâst li mieʹldd Anna Lumikivi (läullmõš, leuʹdd), Hanna-Maaria Kiprianoff (läullmõš, leuʹdd), Marko Jouste (kitara), Pessi Jouste (viulu), Uula Jouste (basso) da Elias Nieminen (perkussio).

Prääʹzneǩpeeiʹv poodd prääʹzneǩvuuʹdest vuäitt tobdstõõttâd Kollʼješkuätt -jiõnntuejjõʹsse. Vuuʹdest lie še kaaupšempääiʹǩ da tåimmjummuž čuäjtõʹlle Sääʹm-museo Siida, Sámi Duodji, Lääʹddjânnam Sääʹmnuõr da Sääʹmteeʹǧǧ Nuõrisuåvtõs di Sääʹm psykososiaalʼlaž tuärj juâǥǥas Uvjj. Vuuʹdest lij ohjjuum tåimmjummuš päärnaid še.

Oʹđđestaazztummuž mušttu riâššum prääʹzneǩ vuõssmõs vuâra viiđ eeʹjj kõõskin

Saaʹmi aazztummuž prääʹzneǩ vuõssmõs vuâra prääʹzkješ påʹrǧǧmannust 1979, ko oʹđđestaazztummšest leäi koummlo eeʹǩǩed. Mâŋŋa tõʹst tõn leät prääʹzkjam lååi eeʹjj kõõskin.

Saaʹmi ouddooumaž Veikko Feodoroff muʹšttal vuõssmõs vuâra viiđ eeʹjj kõõskin jäʹrjstum prääʹznǩest:

”– Čeʹvetjääuʹrest järjstum 70-eeʹjjprääʹznǩest poʹhtte ouʹdde tuõivid tõʹst, što näkam saaʹmi õhttsaž prääʹznǩid vuäitči jäʹrjsted tääuʹjab, håʹt viiđ eeʹjj kõõskin. Jeäʹrben puärrsab puõlvvõk tuäivai, što piâzzči kaaunõõttâd kueiʹmeezvuiʹm prääʹznǩest võl ko vuõim riʹjttje da vueiʹnned, mäʹhtt kulttuur jeäll. Nuʹtt-i mieʹrriim jäʹrjsted 75-eeʹjjprääʹzneǩ siõmmna uuʹccab hääʹmest da tän vuâra Njeäʹllmest, što piâssâp puʹhtted ouʹdde sääʹmvuuʹd saujjvueʹzz. Lij vääžnai saaʹmi aazztummuž historia õhttvuõđâst kaggâd pââjas Paččjooǥǥ da Peäccam siidniiʹǩǩi oʹđđestaazztummuž Njeäʹllem da Keväjääuʹr vuuʹdid di tän vuuʹd sääʹmkulttuur ânnʼjõž vueʹjj.”

Riikki raaj jueʹǩǩe čiččâm jeeʹres siid saaʹmid čorru kueiʹmsteez jälsted koumm jeeʹres riikkâst. Nuuʹbb maaiʹlmvääin mâŋŋa Peäccam vuuʹdest evakuõsttum nuõrttsääʹm aazztet Aanar kååʹdd voudda Keväjääuʹr, Njeäʹllem da Čeʹvetjääuʹr siidid.

Prääʹznka jäʹrjstet määuʹsteʹmes jååʹđtummuž Neiden-Njeäʹllem-Neiden. Vueʹlǧǧemäiʹǧǧ Njauddmest Äʹvv Saaʹmi Muʹzein šeeʹlljast čiâss 8.30 (Lääʹddjânnam ääiʹj, buss lij Njeäʹllmest čiâss 12.00. Jååʹđtummša vuäitt pueʹtted mieʹldd čõõʹđ määʹtǩ. Mäccmõš prääʹzneǩ mâŋŋa. Iʹlmmtõõttmõõžžid jååʹđtummša väʹldd vuâstta Hanna-Maaria Kiprianoff teʹlfooʹnin nââmra +47 952 62 61 leʹbe neʹttpååʹštin hmki(at)dvmv.no.

Peiʹvvporrmõõžž jäʹrjstõõllmõõžži diõtt vuässõõttjid raaukât iʹlmmted vueiʹtlvaž veärr-rääʹjtummšin ouddǩiõʹtte mââimõõzzâst vuõssaarǥ 19.8. Iʹlmmtõõzzid väʹldd vuâstta Heidi Hänninen teʹksttsaaǥǥin nââmra 040 839 3258 leʹbe neʹttpååʹštin heidi.hanninen(at)kolttasaamelaiset.fi.

Prääʹzneǩ jäʹrjste Lappi ortodookslaž ceessansieʹbrrkåʹdd da Saaʹmi siidsååbbar õõutveäkka Sääʹmkulttuurfoondin, Äʹvv Saaʹmi Muʹzeeʹjin di Paččjooǥǥ-Njeäʹllem, Keväjääuʹr da Njauddâm siidõhttõõzzivuiʹm. Prääʹzneǩ jäʹrjstummuž tuäʹrjjee Lääʹddjânnam ortodookslaž ceerkav, Wilderness Hotels, Inergia, Musiikin edistämissäätiö, Ivalon rakennus ja LVI, Northern Lights Village, Kaisan Taksi Ky, Sevetin Peurat rõ, S-market Ivalo da Extrapiste.