Ooccâmääiʹj juåtkkum!

Sääʹmkulttuurfondd ååcc kueiʹt nueʹttjid vueʹssäiggsaž reâuggvuõʹtte suåppmõõžž mieʹldd da koronavirusvueʹjj diõtt šõddâm rääʹjtõõzzid lokku vääʹldeeʹl kueiʹt leʹbe kooum määnpââʹj ääiǥas ǩieʹss – påʹrǧǧmannust 2020 Saaʹmi kueʹllšeeʹllemkulttuur -haʹŋǩǩõʹsse.

Nueʹtti nueʹtte sääʹmvuuʹdest mueʹdd vuâra neäʹttlest da nåʹrre haʹŋǩǩõʹsse vuâmmšõõzzid jaauʹri kueʹllnaaʹlin. Tõn lââʹssen suäna vuässâʹtte nueʹttemnoorõõttmõõžžid, koid riâššât, jos koronavirusvueʹǩǩ luâštt, Čeʹvetjääuʹr da Njeäʹllem-Keväjääuʹr vuuʹdin. Nueʹttemnoorõõttmõõžživuiʹm haaʹleet jeällted da nââneed nueʹttemkulttuur sääʹmvuuʹdest. Čeʹvetjääuʹrest raajât oolǥ nueʹtt košǩǩummuž vääras Sääʹmpõõrt riddu da ruõkkâmpääiʹǩ Sääʹmpõõrt äitta nueʹtt täʹlvvruõkkmõõžž diõtt.

Tuâj håiddmõš õõlǥat ânnʼjõõvvi silttummuž da sääʹm kueʹllšeeʹllemkulttuur tobddmõõžž. Sääʹmǩiõl silttõõzz ǩiõččât ooccja ouddõssân. Lââʹssen eeʹjj 2020 kueʹllhåiddmähss âlgg leeʹd mahssum.

Vuõlttâd ooccmõõžžad ouddâl 27.5.2020 juʹn-a neʹttpååʹštin addrõʹsse info@kolttasaamelaiset.fi leʹbe addrõʹsse Kolttakulttuurisäätiö, Sevettijärventie 9080, 99930 Sevettijärvi. Vuõlttâd mieʹlddõssân tuu meriittloǥstõõǥǥ. Lââʹzzteâđ haʹŋǩǩõõzz haʹŋǩǩõstuâjjla Olsén-Ljetoff Lauraaʹjest teʹl. 045 264 6336 leʹbe laura.olsen-ljetoff@kolttasaamelaiset.fi.