Saaʹmi siidsååbbar âʹnškuätt ođđ logo
Nuõrttsäʹmmlai vaaldšemriâšldõk Saaʹmi siidsååbbar lij âʹnškuättam ođđ logo. Ođđ logo čuäʹjtõʹlleš pâʹsslašttâm-mannu ääiʹj õnnum sääʹmvuuʹd siidsåbbrin.
Nuõrttsäʹmmlaž graaflaž plaaneei da kaartʼteei Erja Taskinen lij plaanääm Saaʹmi siidsåbbar logo vueʹssen siidsåbbar graaflaž kuâsttjõõzz plaanummšest. Taskinen kovvad plaaneemtuâj nääiʹt:
”Vuåǯǯum vuäittmõõžž plaaneed Saaʹmi siidsåbbra logo ja juʹrddemvueʹjjest ouʹdde pueʹđi õutstõs di õhttsallâšvuõtt. Logost säiʹmmčââʹlm kovvee juʹrddi tõʹst, mäʹhtt oʹđđest aazztummuš tueʹjjii koumm nuõrttsäʹmmlaž siid da mäʹhtt õutstõõzz jiijjâs resilieʹnss lij šõddâm. Mij jiijjân poliittlaž vaikktemnääʹll, Saaʹmi siidsååbbar, lij mâʹte säiʹmm, kååʹtt kååđđ säʹmmlaid dommvuuʹdstes õʹhtte.”
Saaʹmi ouddooumaž Veikko Feodoroff lij toođvaž, ođđ logo leät kaiʹbbjam jeäʹrben iʹlmmtõõzzi di jeeʹres čõõđtõõzzi vääras. Vuârddmõššân lij še, što logo âânnmõõžž mieʹldd vääʹldet lokku Saaʹmi siidsåbbar tåimmjen. Feodoroff mieʹldd logo kovvad tåimmʼmõõžž puârast:
”Logo sueiʹmkrâstt muu miõlâst puârast Saaʹmi siidsåbbar tåimmʼmõõžž õʹhtte čõõnni viõkkân. Paččjooǥǥ, Peäccam da Suõʹnnʼjel siidi säʹmmla aazzteš Keväjääuʹr, Njeäʹllem da Čeʹvetjääuʹr siidid nuuʹbb maaiʹlmvääin vuʹvddmõõntõõzzi seuʹrrjõssân. Logo säimmčââʹlm kovvee tän teeʹmm, vueʹddeezvuiʹm määddast roʹttjum leäʹp õinn õhttân meeran õõutsââʹjest nânnsen kueʹddmen sääʹmkulttuurân. Logost vuäitt vueiʹnned še oummid vuässõõttmen siidsåbbri tuʹmmstõktuõjju.”
Saaʹmi siidsååbbar
Saaʹmi siidsååbbar lij nuõrttsaaʹmi äʹrbbvuõđlaž vaaldšemriâšldõk. Saaʹmi siidsåbbar tåimmʼmõõžžâst šiõtteet eeʹjj 1995 šiõttuum sääʹmlääʹjjest (253/1995), koon täävtõssân lij viikkâd ooudâs sääʹmnarood da -vuuʹd jieʹllemåårrmõõžžid da piʹrǧǧeemvuäittmõõžžid, di juäʹtǩǩed da viikkâd ooudâs sääʹmkulttuur. Siidsååbbar-riâšldõk âânn seʹst sääʹmsiidi õhttsaž siidsåbbar, kook lie riâšldõõǥǥ ââʹlmõs mieʹrreei orgaan, di såbbrin kooum eeǥǥas vuârstes vaʹlljuum siidi sääʹmsuåvtõõzz. Siidsååbbar-riâšldõõǥǥ jååʹđat saaʹmi ouddooumaž, koon vaʹlljeet vaalin koumm eeʹjj kõõskin.
teʹkstt: Saaʹmi siidsååbbar
Lââʹssteâđ: Saaʹmi ouddooumaž Veikko Feodoroff, teʹl. 050 396 1297