Saaʹmi siidsåbbrin aktiivlaž saǥstõõllmõš toiʹmmjummuž ooudâsviikkmõõžžâst

Saaʹmi äʹrbbvuõđlaž vaaldšemriâšldõõǥǥ ââʹlmõs tuʹmmjeei orgaan, siidsåbbar, norrõʹtte täʹlvvmannust Njeäʹllmest 16.2.2025 da Čeʹvetjääuʹrest 22.2.2025.

Såbbrin äʹššen leʹjje jm. linjjeei saǥstõõllmõõžž Saaʹmi siidsåbbar toiʹmmjummuž ooudâsviikkmõõžžâst da sääʹmlääʹjj 9 § meâldlaž kueʹllǩeâmpplooʹvi miõttmõõžž vuâđđjurddjin. Siidsååbbar-riâšldõõǥǥ toiʹmmjummuž ooudâsviikkmõʹšše mieʹrreeš vääžnmõs täävtõõzzid da tõõi äiʹǧǧtaaulid. Tän eeʹjj poodd täävtõssân lij seʹlvvted Saaʹmi siidsåbbar sââʹj ooudâsviikkmõõžž õõlmâsvuõiggâdvuõđlaž juriidlaž ooumžen da tõn vaikktõõzzid di saaʹmi ouddoummu da piisar tååimi sââʹj da tõõi ooudâsviikkmõõžž.

Sääʹmsuåvtõõzz tuʹmmje siidsåbbri mâŋŋa 11.3.2025 õnnum såbbreʹstes tååimted mädd- ja meäʹcctäällministeriaaʹje eʹtǩǩõõzz čiõlǥtõõzz raajjmõõžžâst. Siidsåbbrin puõʹđi ouʹdde ooudâsviikkâmtarbbân še teâđtummuž lââʹzztummuž, koon vuâđald sääʹmsuåvtõõzz tuʹmmje, što Saaʹmi siidsåbbra raajât vuäʹppõõzzid teâđtummšest.

Sääʹmlääʹjj meâldlaž kueʹllǩeâmpplooʹvi miõttmõõžž vuâđđjurddjin lie leämmaž linjjeei saǥstõõllmõõžž siidsåbbrin juʹn oouʹdab eeʹjjin. Taʹnni äʹšš puõʹđi saǥstõõllâmnalla Njauddâm vuuʹd siidsåbbra tuejjuum eʹtǩǩõõzz mieʹldd. Saǥstõõllmõõžžin kuhttu vuuʹd siidsåbbar eʹtǩǩee ođđ linjjõõzzid, koid sääʹmsuåvtõõzz ǩiõttʼtâʹlle obbvuõttân ouddlõs linjjõõzzivuiʹm. Tõn mâŋŋa ääʹšš puätt oʹđđest siidsåbbrid ǩiõttʼtõõllâmnalla. Täävtõssân lij jäʹrjsted tän eeʹjj poodd võl nuuʹbb siidsåbbrid kuhttu vuuʹdin.

Siidsåbbar tuʹmmje še, što altteet Saaʹmi siidsåbbra kuulli arkiivmateriaal noorrmõõžž. Äʹššǩiiʹrjid tuäivat käunnʼjed ouddmiârkkân ouddâl oskkumtuâjain toiʹmmjam oummi päiʹǩǩarkiivin. Saaʹmi siidsåbbar täävtõssân lij ruõkkâd ânnʼjõž da norrum arkiivmateriaal  Sääʹmarkiiʹve da nääiʹt staaneed kulttuuräʹrbbvuõđ seillmõõžž puõʹtti puõlvvõõǥǥid.