Saaʹmi siidsåbbrin linjjeet vuâđđjurddjid vaaldšemriâšldõõǥǥ sââʹjest da jeeʹres sääʹmlääʹjj meâldlaž aaʹššin
Saaʹmi äʹrbbvuõđlaž siidsåbbar lie Njeäʹllmest pâʹsspeeiʹv 16.2.2025 da Čeʹvetjääuʹrest sueʹvet 22.2.2025.
Tän eeʹjj siidsåbbrin kuulât sääʹmlääʹjj oođummuž ouddvalmštõõllâmproseeʹss plaanummšest rajjum pro gradu -tuutkâlm čuäʹjtõõllmõõžž. Tuutkâlm raajji čuäʹjtââll såbbrest ääʹšš da vaʹsttad kõõččmõõžžid. Lââʹssen kuhttu såbbrest äʹššen lij linjjeei saǥstõõllmõš sääʹmmlääʹjj 9 §:ff meâldlaž kueʹllǩeâmppooccmõõžži miõttmõõžž vuâđđjurddjin.
“Njauddâm vuuʹd saaʹmi siidsåbbra lij puättam aalǥtõs ǩiõttʼtõõllâd vuâđđjurddjid nuʹtt kueʹllǩeâmpplooʹvin ko luâđastjååʹttemaaʹššin. Ǩiõččim, što kueʹllǩeâmpaid kuõskki saǥstõõllmõõžž âlgg čõõđted Njeäʹllem-Keväjääuʹr saaʹmi siidsåbbrest še, ko tõt lij veiddsõs saaʹmi jieʹllemåårrmõõžžid vaikkteei äʹšš”, mušttal saaʹmi ouddooumaž Veikko Feodoroff.
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Sääʹmvuuʹd siidin õnnum siidsåbbar lie vaaldšemriâšldõõǥǥ ââʹlmõs tuʹmmjeei orgaan, koin tuejjeet vääžnmõs linnjõõzzid saaʹmid kuõskki veiddsõs leʹbe vuâđđjuurdlaž aaʹššin. Saaʹmi aktiivlaž vuässõõttmõš såbbrid lij tõn diõtt vääžnai nuʹtt vaaldšemriâšldõõǥǥ toiʹmmjummuž ko juätkkjeeivuõđ peäʹlest.
Tän eeʹjj såbbrin saǥstõõlât še vaaldšemriâšldõõǥǥ sââʹjest da toiʹmmjummuž ooudâsviikkmõõžžâst.
“Saaʹmi siidsåbbar toiʹmmjummuž oouddâsviikkmmõõžž linjjeei saǥstõõllmõõžž puuʹtim saǥstõõllâmnalla siidsåbbrid, ko näkam miârkteei aaʹššin âlgg vuõssmõsân kuullâd õutstõõzz da vuäǯǯad meer juʹrddi aaʹšši ooudâsviikkmõʹšše”, Feodoroff särnn.
Såbbrin ǩiõttʼtõõlât še Saaʹmi siidsåbbra kuulli arkiivmateriaal noorrmõõžž da kuulât ääiʹjpoddsaž aaʹššin.
Njeäʹllem-Keväjääuʹr vuuʹd saaʹmi siidsååbbar ââʹnet pâʹsspeeiʹv 16.2.2025 ääʹljeeʹl čiâss 12.00 Njeäʹllem sieʹbrpõõrtâst (Siikajärventie 40).
Njauddâm vuuʹd saaʹmi siidsååbbar ââʹnet sueʹvet 22.2.2025 ääʹljeeʹl čiâss 11.00 Čeʹvetjääuʹr škooulâst (Sevettijärventie 9076).
Saaʹmi siidsååbbar
Saaʹmi siidsååbbar lij saaʹmi äʹrbbvuõđlaž jiõččvaaldšemriâšldõk, kååʹtt lij juätkkam toiʹmmjummšes õutstõõzz seʹst čueʹđid eeʹjjid. Saaʹmi siidsåbbar seuʹrrai da veekk ooudâs saaʹmi vuõiggâdvuõđi teâuddjummuž da lij saaʹmi veerǥlaž eeʹtǩǩeei.
Saaʹmi siidsåbbar vääžnmõs tuejj lij saaʹmi äʹrbbvuõđlaž jieʹllemvueʹjji da jieʹllemåårrmõõžži di sääʹmǩiõl da -kulttuur tuõʹllʼjummuš da ooudâs viikkmõš.
Ânnʼjõžääiʹj siidsååbbar-riâšldõk âânn seʹst sääʹmsiidi õhttsaž siidsåbbar, kook lie riâšldõõǥǥ ââʹlmõs mieʹrreei orgaan, di såbbrin kooum eeǥǥas vuârstes vaʹlljuum siidi sääʹmsuåvtõõzz. Siidsååbbar-riâšldõõǥǥ jååʹđat saaʹmi ouddooumaž, koon vaʹlljeet vaalin koumm eeʹjj kõõskin. Tän lââʹssen Saaʹmi siidsåbbrest reâugg piisar.
Siidsåbbar
Njeäʹllem-Keväjääuʹr da Njauddâm sääʹmvuuʹdin ââʹnet vuuʹdest jälsteei saaʹmi õhttsaž siidsåbbar uuʹccmõsân õõut vuâra eeʹjjest. Siidsåbbar lie vaaldšemriâšldõõǥǥ ââʹlmõs tuʹmmjeei orgaan. Siidsåbbrin tueʹjjeet vääžnmõs linnjummšid saaʹmid kuõskki veiddsõs da vuâđđjuurdlaž aaʹššin di ouddmiârkkân vaʹlljeet sääʹmsuåvtõõzzid da vaal-luʹvddkååʹdd.
Mieʹrreemvääʹld siidsåbbrin vueiʹtte ââʹnned såbbra vuässõõtti tiuddâkksa siidâst põõššinalla jälsteei sääʹm da siʹjji pieʹllkueiʹm. Jõs såbbrest ǩiõttʼtõõllâm vuâlla åårrai äʹšš kuõskat jeeʹres oummu ouddõõzzid leʹbe vuõiggâdvuõđid, lij suʹst peäggtum vueʹzzin vuäittmõš vuässõõttâd såbbra da ââʹnned särnnamvääʹld toʹben. Siidsååbbar lij mieʹrreemvääldlaž, ko pääiʹǩ âʹlnn lie 10 tiuddâkksa siidâst põõššinalla jälsteei sääʹm leʹbe siʹjji pieʹllkueiʹm.
Lââʹssteâđ: Saaʹmi ouddooumaž Veikko Feodoroff, teʹl. 050 396 1297