Sääʹmkulttuurfondd da Saaʹmi siidsååbbar Heʹlssnest 27.–28.2.2025
Sääʹmkulttuurfoond da Saaʹmi siidsåbbar eeʹttǩeei leʹjje Heʹlssnest täʹlvvmannu looppâst Lääʹdd Kulttuurfoond (Suomen Kulttuurirahasto) eeʹǩǩprääʹznǩest da kaaunõʹtte mädd- da meäʹcctäällministeria eeʹttǩeeʹjivuiʹm. Sääʹmkulttuurfoond prääʹznǩest da kaaunõõttmest eeʹttǩee äʹššooumaž Anna-Katariina Feodoroff da halltõõzz saaǥǥjååʹđteei Heidi Hänninen. Saaʹmi siidsåbbar-ǥõs eeʹttǩee ouddooumaž Veikko Feodoroff di väärrouddooumaž da Saaʹmi siidsåbbar piisar Terhi Harju.
Saaʹmi siidsåbbar da Sääʹmkulttuurfondd kaaunõʹtte mädd- da meäʹcctäällministeria eeʹttǩeeʹjivuiʹm piâtnâc 28.2. Ministeriast kaaunõõttmõʹšše vuässõʹtte kansliajååʹđteei Pekka Pesonen di porrmõšjuâkkaz mäddvuuʹd oouʹdeemjuâkksest (lääddas ruokaosaston maaseudun kehittämisyksikkö) spesiaaläʹšštobddi Laura Jänis da Kaisa Pethman da vuõiggâdvuõđlaž juâkksest halltõsduumšeǩ Markus Lounela. Kaaunõõttmõõžžâst saǥstõõlim jm. saaʹmi aaʹššihåiddma, kääzzkâʹsttemtuärjja da kueʹllčaaʹʒʒi håiddma vaʹrrjum mieʹrrtieʹǧǧin, koid määuʹset sääʹmlääʹjj vuâđald Mäddtäälltällõõzz oouʹdeemfoond (Makera) vaaʹrin. Seämmast saǥstõõlim meäʹrrtieʹǧǧ riʹjttjeeivuõđâst di teäggtõõzz staannmest pueʹttiääiʹjest. Saaʹmi siidsåbbar sââʹjj da toiʹmmjummuž ooudâsviikkâm leʹjje še saǥstõõllâmnalla.
Lääʹdd Kulttuurfoond halltõs da ouddoummu leʹjje påʹrǧǧmannu 2024 looppâst Sääʹmkulttuurfoond da Saaʹmi siidsåbbar kueʹssen Čeʹvetjääuʹrest. Sij tobdstõʹtte sääʹmkulttuuʹre, saaʹmi historiaaʹje da ânnʼjõž vuâkka di Sääʹmkulttuurfoond da Saaʹmi siidsåbbar toiʹmmjummša. Jieʹlim kueʹssivuiʹm Čeʹvetjääuʹr ǩiõllpieʹzzest še, koon Lääʹdd Kulttuurfondd lij tuärjjaam. Juʹn määŋgid iiʹjjid Kulttuurfondd lij miârkteeinalla tuärjjääm Sääʹmkulttuurfoond toiʹmmjummuž määŋgi veäʹǩǩtieʹǧǧi veäkka da lij leämmaž samai perstõõvvâm Sääʹmkulttuurfoond toiʹmmjummšest nuʹtt ǥo še sääʹmǩiõl da -kulttuur vueʹjjest Lääʹddjânnmest. Kulttuurfondd tuärjjii Sääʹmkulttuurfoond taʹnni še miõđeeʹl 80.000 eeuʹr veäʹǩǩtieʹǧǧ čiõlǥtõʹsse sääʹmǩiõl vueʹjjest da ââʹnnemvuäittmõõžžin lääʹdd õhttsažkååʹddest.
Lääʹdd Kulttuurfoond eeʹǩǩprääʹzniǩ lij jurddum koččum kueʹssid, kook koʹlle foond čõõnâsjooukid leʹbe õhttsažtuejjkueiʹmid leʹbe lie eeʹjj 2025 veäʹǩǩteäʹǧǧvuäǯǯai. 86-ekksaž Lääʹdd Kulttuurfoond eeʹǩǩprääʹzniǩ prääzkje neljdpeeiʹv 27.2. Heʹlssnest Finlandia-põõrtâst. Kueʹss prääʹznǩest leʹjje pâʹjjel dohat. Prograammâst leʹjje jeäʹrbi mieʹldd saakkvuâr tiõttjest, čeäppõõzzâst, čuõvtõõzzâst da demokratiast, õlltässʼsaž musikkčuäjtõõzz, video vaaikteei veäʹǧǧtieʹǧǧin, eeʹjj 2025 veäʹǩǩtieʹǧǧ da ciist di jeäʹǩǩää looppâst prääʹzniǩveärr, koon äiʹǧǧen leäi vuäittmõš saǥstõõllâd vääžnai čõõnâsjoouki eeʹttǩeeʹjivuiʹm. Lääʹdd Kulttuurfoond halltõõzz saaǥǥjååʹđteei farmakogenetiikk professor Mikko Niemi mušttli jiiʹjjes saakkvuârstes jeäʹrbi mieʹldd halltõõzz da ouddoummi kõʹllʼjummšest Čeʹvetjääuʹrest, da mõõn nalla da puârast tuärjj sääʹmkulttuuʹre kuâsttai taʹnnʼjaž veäʹǩǩtieʹǧǧin. Čeʹvetjääuʹr reeisast saaǥǥjååđteeja leäi jeäʹrben pääccam miõʹlle kõʹllʼjummuš Čeʹvetjääuʹr ǩiõllpieʹzzest. Sääʹmkulttuurfoond vuäǯǯam veäʹǩǩteäʹǧǧ da sääʹmǩiõll da -kulttuur ǩieʹsse mäŋggsi miõl, da tõi aaʹššin piâzzi mainsted čõõđ jeäʹǩǩää.
Lääʹdd Kulttuurfondd (Suomen Kulttuurirahasto sr) lij väʹlddkååddlânji toiʹmmjeei privatt fondd. Kulttuurfoond mieʹrren lij raajjâd määŋgärvvsa da ǩeâllʼjeei õhttsažkååʹdd, tåimmad tiõtti, čeäppõõzz da kulttuur peäʹlest di smeʹllkâʹtted pueʹttiääiʹj čieʹppid oʹnnsted samai puârast.
Lääʹdd Kulttuurfondd šâdd Foondâst da tõn Kueʹddtemõhttõõzzâst. Fondd peäʹlstes šâdd kõõskõsfoondâst da 17:st mäddkåʹddfoondâst. Kulttuurfoond vääʹr lie puättam eeʹǩǩlooʹjji äiʹǧǧen vuåǯǯum sǩiâŋkkõõzzin da investâʹsttmõõžži puåttjin. Škooulniiʹǩǩi čõõđ viikkâm altteemnoorõʹsse eeʹjj 1938 vuässõʹtte pâʹjjel 170 000 läʹddliʹžžed.
Kulttuurfondd meâtt juõʹǩǩ eeʹjj tiõttja da čeäppõʹsse pâʹjjel 50 miljoon euʹrred veäʹǩǩteäʹǧǧen. Lââʹzzen foondâst lij jiiʹjjes-i toiʹmmjummuš tiõtti, čeäppõõzz da kulttuur oouʹdeem diõtt. Kålggmannu 2024 ooccmest Kulttuurfondd vuäǯǯai rekoordlaž 10 706 ooccmõššâd, koin veäʹǩǩtieʹǧǧ miõʹtteš 831 ooccja. Miõttum mieʹrr leäi õhttsiʹžže 29 miljoon euʹrred.
Sääʹmkulttuurfondd späʹssbââšš Lääʹdd Kulttuurfoond vaarvuâlaž ǩiõll- da kulttuurääʹrb tuärjjummšest ååʹn da ääiʹjab iiʹjjin!