Saaʹmi kueʹllšeeʹllemkulttuur –haʹŋǩǩõõzzâst seeʹrdet kõskkpoddsânji ougglõsmainstâttmõʹšše

Sääʹmkulttuurfondd vuäǯǯai eeʹjj 2019 Lappi ELY -kõõskõõzzâst teäggtõõzz Saaʹmi kueʹllšeeʹllemkulttuur – äʹrbbvuõđlaž teâđ miârktõs, ruõkkmõš da äuʹǩǩummuš sääʹmvuuʹdest -haʹŋǩǩõʹsse. Haʹŋǩǩõõzzâst čiõʹlǧǧeet måkam sââʹjj säʹmmlai kueʹllšeeʹllemäʹrbbvuõđâst lij ânnʼjõžääiʹj da kõskksaž roolâst lij säʹmmlai äʹrbbvuõđlaž teâtt jm. kueʹllšeellmõõžž, jeeʹresnallšem kueʹllšeeʹllemvuõʹjjid, äʹrbbvuõđlaž kueʹllšeeʹllempaaiʹǩid da kueʹllmieʹri muttâz kuõskeeʹl. Õhtt vääžnai teâđ noorrmõõžž nääʹll lij mainstâttmõõžž, kook čõõđtet eeʹjj 2020 ääiʹj saaʹmivuiʹm.

Haʹŋǩǩõstuâjjlaž Laura Olsén-Ljetoff ääiǥai vueʹlǧǧed kueʹllšiiʹllʼji mieʹldd šeeʹlled kueʹlid odm. juŋŋsivuiʹm da kaʹlddjest vuäggeeʹl da ruõkkâd saaʹmi kueʹllšeeʹllemäʹrbbvuõđ videoivuiʹm da snimldõõǥǥivuiʹm juʹn ǩiđđtääʹlv 2020 ääiʹj. Koronavirusvueʹjj diõtt puõʹtti neäʹttlid plaanuum kueʹllšeeʹllemreeisaid jeäʹt tueʹjjuku da seeʹrdet, jos vueiʹtlvaž, poka čoʹrstemvueʹǩǩ Lääʹddjânnmest lij poottam.

Haʹŋǩǩõõzzâst seuʹrrjet Tiõrvâsvuõđ da pueʹrrvââjjam stroiʹttel (THL) vuäʹppõõzzid uuʹcceed sosiaalaž kontaaktid koronavirusepidemia leävvnummuž miâlǥummuž diõtt. Vueʹjj diõtt mainstâʹttmõõžžid tueʹjjeet ougglõsõhttvuõđin  juʹn-a teʹlfoon leʹbe interneeʹtt pääiʹǩ. Jos tuu miõl ǩieʹss uʹvdded mainstâttmõõžž haʹŋǩǩõʹsse saaʹmi kueʹllšeeʹllemkulttuur pirr, vääʹld õhttvuõđ Lauraaʹje juʹn-a soiʹttjeeʹl nââmra 045 2646 336 leʹbe neʹttpååʹštin addrõʹsse laura.olsen-ljetoff@kolttasaamelaiset.fi.