Sääʹmkulttuurneäʹttel juätkkai neäʹttel 38 da teemmen lie kuuʹrniǩ da Däʹrjj põrtt

Sääʹmkulttuurneäʹttel älgg piâtnâc 11.9.2015 čõhččpeeiʹvin Äʹrbbvuõttpõõrtâst da juätkkai juʹn sueʹvet 12.9.2015 Čeʹvetjääuʹrest ǩiõtt-tuâjaid tuejjeeʹl. Ǩiõčč lââʹss teâđaid täi šõddmõõžži pirr täʹst.

Mââibaarǥ 15.9.2015 riâššât Sääʹmkulttuurneäʹttel saaʹmi porrmõõžži raajjmõõžž kääzzkâʹsttempõrtt Männikköst Âʹvvlest ääʹljeeʹl čiâss 13. Čieʹppes saaʹmi pävvrivuiʹm raajjâp kuuʹrniǩ veeʹres šaapšin. Tät šõddmõš lij kääzzkâʹsttempõõrt aazzjid, leâʹša mueʹdd jeeʹres oummu še vuäiʹtte pueʹtted mieʹldd. Ko haaʹlääk pueʹtted mieʹldd, õõlǥak iʹlmmtõõttâd soiʹttjeeʹl nââmra 045 178 0200 mââimõsân vuõssaarǥ 14.9. čiâss 13 mõõneeʹst.

Sueʹvet 19.9. noorõõttâp Njeällma Dääʹrj põʹrtte. Jurddân lij raajjâd õõutsââʹjest čuâl ǩeʹddmääʹrǩ pirr da nääiʹt vuäǯǯad pääiʹǩ seämmanallšemen, ko tõt leäi teʹl ko Däʹrjj da Båʹres jälste tõʹst. Veärrân taʹrjjeet kuuʹrniǩ dno. Peivva kooll jeeʹres ǩeʹddmääʹrǩ pueʹrummuš, sääunõõttmõš da musiikk še. Šõddmõš älgg čiâss 11 ääiʹj da peštt jeäʹǩǩää räjja. Pueʹtted mieʹldd!