Saǥstõõllmõõžž saaʹmi paaʒʒtõõzzi maacctummšest juätkkje ääʹšš valmštõõlli tuâjj-jooukâst

Taar Sääʹmteʹǧǧ jäʹrjsti 10.6. Njauddmest da 11.6. Njeäʹllmest saǥstõõllmõõžžid saaʹmid Paččjooǥǥ siid saaʹmi paaʒʒtõõzzi maacctummšest. Šõddmõõžžid vuässõʹtte sääʹm Taar da Lääʹddjânnam vuuʹdest. Saǥstõõllmõõžž jååʹđti Runar Myrnes Balto Taar Sääʹmteeʹǧǧest da saǥstõõllmõõžžid vuâđđee Jan Bjaalie Oslo universiteeʹttest da Áile Aikio Lappi universiteeʹttest. Sääʹm mušttle saǥstõõllmõõžžin jiiʹjjez vuäinlmid paaʒʒtõõzzi maacctummšest da oʹđđest ruõkkmõõžžâst. Saaʹmi siidsåbbar eʹtǩǩeeʹjen såbbrin vuässõʹtte Njauddmest saaʹmi ouddooumaž Veikko Feodoroff di Njauddmest da Njeäʹllmest vääʹrrouddooumaž Terhi Harju da Saaʹmi siidsåbbar eʹtǩǩeeʹjen tuâjj-jooukâst toiʹmmjeei Heini Wesslin.

Saǥstõõllmõõžž ääʹššest juätkkje tuâjj-jooukâst, kååʹtt valmštââll ääʹšš Taar Sääʹmtegga ǩiõttʼtõõllâmnalla. Tuʹmmstõõǥǥ paaʒʒtõõzzi maacctummšest tueʹjjad Taar Sääʹmteʹǧǧ, kåått alttii eeʹjj 2022 tuâjj-joouk valmštõõllâd ääʹšš. Tuâjj-jooukâst lij eʹtǩǩeei Oslo universiteeʹttest, Äʹvv Saaʹmi Muʹzeeʹjest, Saaʹmi siidsåbbrest da Taar beäʹl Sääʹmteeʹǧǧest. Sääʹmvuuʹdi siidsåbbrin ǩiõttʼtõʹlleš ääʹšš eeʹjj 2023 da Saaʹmi siidsååbbar lij tääi tuʹmmstõõǥǥi vuâđald tååimtam tuâjj-jouʹǩǩe peäʹlestvälddmõõžž, koʹst säärnat, što oʹđđest ruõkkmõõžž vueʹlǧǧemsââʹjjen âlgg leeʹd pokoiniiʹǩǩi ciistâst âânnmõš.

Paččjooǥǥ siid saaʹmi paaʒʒtõõzz lie ruõkkum Paččjooǥǥ Äuʹddsuâllʼja. Suõllust tueʹjjee kuäivummšid 1950-looǥǥ looppâst. Vueʹss paaʒʒtõõzzin lie oʹđđest ruõkkum Svanvik ruõkkâmsâjja, leša 21 sääʹm paaʒʒtõõzzid viʹǩǩeš Oslo universiteeʹtt bioantropolooǥlaž norldõõǥǥid.