Šiõǥǥ sääʹmǩiõli neäʹttel 2024!

Sääʹmkulttuurfoondâst rämmšep, ko vuäǯǯap sääʹmǩiõli neäʹttel cisttân iʹlmmted, što sääʹmǩiõllsaž seiʹnnkaʹlndar eeǥǥas 2025 lij iʹlmstõõvvâm! Kaʹlndaar puäʹtte jueʹǩǩemnalla pueʹtti mannust da tõi jueʹǩǩmest iʹlmmtep tääʹrǩben mâʹŋŋlest. Kaʹlndaar lie saaʹmid määustem.

Eeʹjj 2025 kaʹlndar lij vuõssmõs vuâra euʹnnkaʹlndar. Kaʹlndaar snimldõõǥǥid lij sniimmâm Pertti J. Pelto, kååʹtt siirdi tunâlmma ǩeässa 2024. Pelto leäi ameriikkläʹddlaž sosioloog, kååʹtt tuʹtǩǩii saaʹmi õhttsažkååʹdd muttâz da šiõttlõõvvmõõžž saaʹmi oʹđđestaazztem mâŋŋa. Pelto jälsti Čeʹvetjääuʹrest ođđeeʹjjmannust 1958 njuhččmännǥa 1959 da tõn määʹtǩest son sniimi jäänbõõzz 2025 seiʹnnkaʹlndaar snimldõõǥǥin. Sääʹmkulttuurfondd haaʹlad ciʹsttjed Pertti J. Pelto (1927–2024) moošt puuʹteeʹl tän kaʹlndaar veäkka puk saaʹmid vueiʹnnemnalla Pelto sniimmâm fiin snimldõõǥǥid tõn ääiʹjest, ko son jälsti saaʹmi åʹrnn.

Sääʹmkulttuurfondd späʹssbââšš še Antti Pentikäinen da Oulu ortodookslaž aaʹrhelkåʹddfoond, kook lie vueiʹtlvâsttam seiʹnnkaʹlndar 2025 õlmstâʹttem. Kaʹlndar lij puuʹtʼtum aaʹrhelkåʹddfoond da Pentikäinen šõddâmpeiʹvvnoorõõzz vaaʹrin. Kaʹlndaar raajjmõõžž lââʹzzen Pentikäinen šõddâmpeiʹvvnoorõs lij vieʹǩǩtam še saaʹmi nueʹttemäʹrbbvuõđ juätkkmõõžž da kueʹllčaaʹʒʒi håiddmõõžž Sääʹmkulttuurfoond pääiʹǩ, ko leäʹp pâsttam vuäʹstted čeʹvetjäuʹrrniiʹǩǩid ođđ nueʹtt da altteed vuäʹmm nueʹtt teevvmõõžž. Nueʹttemtemma õhttneeʹl kaʹlndrest lie-i mieʹldd vuäʹppõõzz nueʹtt ââʹnnma.

Sääʹmkulttuurfondd späʹssbââšš še pukid järrsid, ǩeäk lie vueiʹtlvâsttam kaʹlndaar raajjmõõžž da tuäivat sami šiõǥǥ sääʹmǩiõli neäʹttel pukid! Sääʹmǩiõli neäʹttlest lij šiõǥǥ mošttʼted še, što Sääʹmkulttuurfoondâst aaʹššid hååideen lij vueiʹtlvaž mainsted säämas še.

Looǥǥ tääiʹben, Mii lij Sääʹm ǩiõli neäʹttel? – Giellavahkku